尋日台灣股市好熱鬧，因為以賣牛扒起家嘅王品集團終於上市嘞，收市勁升百分之四十五，投資者真係賺到笑。公司董事長戴勝益係行銷高手，次次出場都會製造話題。今次佢帶埋班着晒紅衫嘅主管，踩單車到交易所。
戴勝益係一個好鍾意做運動、創意十足嘅老闆。公司做上市推介嗰陣，特登揀喺孔廟舉行，佢話「係孔子教我半部論語而創造王品」嘅，佢引用論語所言，「願車、馬、衣、裘與朋友共，敝之而無憾」。所以佢送畀交易所嘅上市禮物就係一部《論語》嘞。
戴勝益（左）帶埋班着晒紅衫嘅主管踩單車到交易所。
