政壇：搞搞政：挺唐投白票田二少被鬧爆

特首候選人唐唐嘅醜聞爆唔停，唐營可能見選情有變，近日就有人發起投白票行動，企圖一拍兩散。繼嚟自商界嘅富貴黨榮譽主席田北俊話會投白票後，佢細佬新民黨副主席田北辰都聲言「暫時傾向投白票」，真係「其利斷金」。田二少尋日就喺社交網站facebook表達有投白票意向，但隨即被網民批評「非唐不投」嘅做法，難免令人覺得佢兩兄弟官商勾結，話唔想投票就不如唔好做選委喎。

有網民直斥佢兩兄弟話：「你哋應該睇民意，唔係base on你喜唔喜歡！邊個投白票，第日你個人或富貴黨參與直選，就『票債票償』！」總之網民唔支持佢投白票。面對咁多不滿聲音，田二少嘅回應都有啲無奈，強調投白票只係暫時嘅傾向。不過，有網民就教精佢要慎言，應該向市民講「未有傾向投畀邊個候選人」，好過話傾向投白票，否則只會令選民失望。