衡工量值避權貴 官官相衞生腐敗

曾蔭權腐敗醜聞長爆長有，日日新鮮，原來佢除咗傍住富商黐飲黐食，仲經常浪費納稅人金錢周遊列國，簡直係公私通吃，舔盡着數。

立法會特別財委會揭露，未計本財政年度，煲呔曾○七年上任至今已經外訪五十四次，使咗超過一千萬元公帑，其中淨係訪問美國一程就使咗百幾萬元。再睇○九年有次外訪澳門，短短兩日一夜，平均每人花費二千二百多元，對比佢同夫人坐富商遊艇豪遊澳門，三日兩夜只係畀咗五百元，根本不成比例，證明佢算死草，便宜貪到盡。

最離奇嘅係，煲呔曾愈接近任期完結，外訪開支就愈大。○七至○八年度，佢總共外訪六次，花費九十一萬元；而一○至一一年度，外訪次數就急升到十四次，總共花費一百七十一萬元；一一至一二年度外訪十次，花費更激增到四百幾萬元，平均每次四十幾萬元，簡直豪華過豪華團。

其實，煲呔曾早就有名你叫，「離岸特首」吖嘛，周遊列國本來就係家常便飯，依家時日無多咯喎，更加要舔到盡喇。正所謂，有權不用，逾期作廢，佢口口聲聲要為港人奮鬥至最後一分一秒，你信唔信吖？叮，揩油至最後一分一秒就真！

講開又講，煲呔曾咁鍾意做離岸特首，講得好聽啲叫貪小便宜，講得難聽啲根本就係濫用職權，搵納稅人笨。仲有吖，佢唔只着數舔到盡，仲帶挈埋自己友添。呢，香港回歸唔夠十五年，特首辦職員已經由六十二人激增至過百人；而開支增幅就更加驚人，董建華時代特首辦每年預算大約六千萬元，煲呔曾一上台就增加到接近七千萬元，其後年年增加，至本年度已經超過九千萬元，短短七年多咗超過五成，問你服未！

講到呢度，你可能會問，特首辦人手不斷膨脹，開支連年激增，好明顯係浪費公帑，點解從來唔見審計署提起嘅？唔講猶自可，一講把鬼火，原來回歸以來，審計署從來未對特首辦及中央政策組進行衡工量值審計，亦即係話，特首辦根本無王管，想做就去做，想使就去使，唔怪得煲呔曾爆出咁多腐敗醜聞喇！

係呢，點解審計署放棄監管權力，唔敢查特首辦呢？唔通投鼠忌器，一聽到特首兩個字就腳軟？計太一叮話齋，香港原來唔只有官商勾結，仲有官官相衞，想唔烏煙瘴氣都幾難咯，叮！