CULTURE噏：凝住那些情

這次我們找來兩位90後女大學生，分享旅行的窩心經歷。

「人在旅途中，意外走進那遠離煩囂的小村莊，獨有的古舊村屋，鳥語花香，我提着相機，將眼前最美一剎那凝住，並非那美不勝收的花鳥叢林，而是那雙熱烈招待着我們的老伴，那杯淡淡的茶，那種濃濃的人情味。」

愈來愈多喜歡旅行的年輕人，不再滿足於當地的靚人靚景、可口美食，而是要體驗「當地情」，更透過相片及文字，與人分享。

「旅行時影相，唔止將歡樂一刻留低，仲可以將經歷嘅一點觸動留低。」

Jessie喜愛旅遊，曾到過美國、台灣等地。那些日子，旅行對她的意義，就是尋歡樂。「嗰陣最鍾意影靚人靚景、美食等。」

一次與旅行家交流後，徹底改變她對旅行的看法。「讀大學後，有一次參加一個由旅行家主講嘅講座，令我對旅行嘅意義有了新領悟。」旅行不再單純尋快樂，而是以不同心情體驗當地文化，再以相機或文字記錄瞬間的觸動。「之前去台灣搭的士，司機好好人，佢知道我哋係遊客之後，就不斷介紹好去處畀我哋。但因為掛住同我哋傾偈，臨到目的地時兜錯路，佢竟然撳熄個咪錶，重新計錢。當時湧起個諗法：台灣人熱情好客，比街外美輪美奐嘅夜景更加璀璨。」

「要感動人，唔一定要有高超文學技巧，而係要將最真實嘅感受呈現。」

除Jessie，Pandus也喜愛以文字及照片，分享旅途上的點滴。縱然自問文筆不算華麗，但她確信最簡單的文字，亦能打動他人，「唔使高超嘅修辭技巧修飾，亦唔要長篇大論，只要你有真切感受，人哋一定感受到。」

Pandus在記錄旅行每次觸動的同時，都會反思。「有次去到一個郊區，風景好優美，但條路就被破壞，附近亦堆滿垃圾，我就諗，究竟喺我享受旅行嘅時候，會唔會不知不覺地，破壞咗呢片咁美好嘅土地呢？」