政壇：唐唐冇坐遊艇 切割貪曾

煲呔曾被踢爆貪遍海陸空後，大批市民上街聲討佢，廉政公署又立案查佢，真係生人勿近。連佢一直力撐、出動夕陽政府「助選」嘅特首候選人唐英年都費事畀佢拖累，尋日唐唐出席一個環保論壇時，自稱好多年都冇坐過遊艇出海，寸爆煲呔曾之餘，仲明顯劃清界線。

尋日三位特首候選人破天荒同場辯論，有環保人士問佢哋有無方法可以拯救中華白海豚。當唐唐自稱好多年未坐過遊艇出海，所以無親眼睇過中華白海豚後，對手梁振英（CY）就回應話：「我唔鼓勵市民坐遊艇出海睇白海豚嘅！」真係寸到唐唐應一應。至於候選人何俊仁就話自己多數乘搭公眾交通工具，好少會坐遊艇，擺明寸爆貪坐遊艇嘅煲呔曾。

無回鄉卡嘅鐵頭仁多年來都未返過內地，佢自嘲話如果自己做到特首，第一件事係要攞番張回鄉卡，等佢可以返內地同廣東省嘅官員討論環保政策喎。