政壇：搞搞政：王國興搬正義女神寸唐營

立法會搬咗去添馬艦新大樓後，雖然地方一闊三大，但好多議員心底都好掛住舊大樓，日前立法會通過援引特權法查西九事件後，議會內黑幕重重，搞到工聯會嘅王國興好o架，尋日直呼：「係咪搬離咗舊大樓，已經唔喺正義女神嘅腳下，因此做嘢愈嚟愈唔公正、唔正義！」

王國興嘅意思係，中環舊大樓有蒙眼、象徵公義嘅女神畀議員知所警惕，家吓搬咗地方後，議員係咪連公義之心都冇埋呢？佢咁激氣係因為死撐特首候選人唐英年嘅建制派立法會議員，不惜罔顧立法會嘅公信力，強行拔出「特權法」呢把尚方寶劍，調查唐唐對手梁振英被指漏報西九利益事件，立法會係尊貴嘅立法機構，竟然淪為一個勢力陣營嘅殺人之刀，難怪有啲公道之心嘅議員都睇唔過眼。

就係咁，王國興尋日出席一個電台節目中大動真氣，鬧爆調查西九事件專責委員會組成不公，竟然出現過半數委員都有提名被調查者嘅對手現象，直指咁樣唔係利益衝突又係乜嘢？