政壇：湯顯明環球公費遊

煲呔曾貪盡富豪提供嘅海陸空款待外，多年來官式外訪更盡使公帑，五年任內外訪多達五十四次，納稅人為此付鈔一千多萬元。煲呔曾豪使公帑外訪嘅陋習，就連喺○九年獲佢眷顧秘密續約三年嘅廉政專員湯顯明都上行下效，上一個財政年度共有九次外訪，離港共三十八日，即係一年夾埋有成個月時間唔喺廉署坐鎮，同煲呔曾一樣都係無王管。

南美英國內地輪住去

立法會議員審議財政預算案建議獲悉唔少政府嘅敏感資料，本報就喺湯顯明向立法會特別財委會提交嘅文件中，發現佢喺上一個財政年度九次外訪，合共去咗三十八日，除咗分別去咗一次南美、英國及新加坡外，其餘大部分都係返內地同澳門，合共用咗二十三萬五千元公帑，除開平均每日使咗六千一百多元，仲多過政府向市民派發嘅六千元，所以高官以外訪名義使錢真係易過借火。

湯顯明嘅九次外訪中，有兩次去咗澳門，其中一次去兩日，使咗三千九百元，即係平均每日使咗二千元。至於另一次就去咗四日，合共使咗一萬三千三百元，即係一日使三千三百多元，使多咗六成幾。巧合嘅係，湯顯明全年九次外訪總共去咗三十八日，而煲呔曾去年外訪十次夾埋亦去咗三十九日，兩個年中都離岸個幾月，真係同撈同煲噃！

更甚嘅係，湯顯明唔止同煲呔曾啱key，同東海集團主席黃楚標一樣關係密切，相識多年兼係高爾夫球波友，佢哋三個嘅「鐵三角」關係真係耐人尋味，難怪有人質疑湯顯明會干預廉署調查煲呔曾涉嫌收受利益嘅醜聞喇。