庸官禍港不止 競爭優勢不再

香港今年真係衰開有條路，「曾商勾結」醜聞愈揭愈臭，特首選舉選賢能變揀爛橙，連本港賴以生存嘅競爭力，唔止龍頭地位保唔住，優勢更係買少見少。唉，庸官為禍，點會有運行吖。

社科院發表「中國省域競爭力藍皮書」，唔睇唔知，原來早喺一○年，本港經濟綜合競爭力喺包括港澳台及內地各省市共三十四個區域中排第三得季軍，台灣穩坐冠軍寶座，連廣東都超越香港。

報告顯示，由二○○六至一○年嘅「十一五」期間，香港排名開頭一直係第二位，但二○○九至一○年度跌咗一位險保銅牌，而台灣呢五年一直攞金牌。話時話，本港無論政治、經濟定係社會發展，樣樣停滯不前甚至大倒退，正一輸得有道理。逆水行舟，不進則退，如果競爭力係咁跌，香港三甲不保係時間問題咋。

報告唔係隨口噏當秘笈o架，評核包括咗一百幾項唔同級數嘅指標，內容涉及宏觀經濟、產業經濟、可持續發展、財政金融、發展環境、政府作用力、發展水平同統籌協調等方面競爭力。研究人員話，雖然香港多項指標仍處於上游區，但由排位變化睇，宏觀經濟同產業經濟競爭力正在下降。

沉舟側畔千帆過，病樹前頭萬木春。香港競爭力每況愈下嘅警鐘響起，唔係第一次，亦都唔會係最後一次，無論係國際調查定係國內調查，都顯示香港係王小二過年，一年不如一年。呢，只不過幾年啫嘛，邊緣化嘅惡夢就變成咗現實嘞。

冇計啦，家陣嘅香港金玉其外、敗絮其中，經濟冇方向，市民冇希望，梗係冇幸福感啦。話到尾，都係因為政府無能，高官無恥。呢嗱，做阿一嘅曾蔭權淨係顧住群埋班富商黐飲黐食攞着數，前阿二唐英年唔係掛住掘大窿、起地宮，就係做「課外活動」，最緊要自己爽，話之你競爭力跌到趴街。

庸官禍港不止，競爭優勢不再。計太一叮話齋，香港短短十幾年由回歸前嘅亞洲四小龍之一，淪落到被國際社會鄙視、內地同胞睇唔起嘅地步，如果再唔爭氣，淪為中國二、三線城市，甚至變番做小漁村，一啲都唔出奇o架，叮！