政商定格：陳正欣撐傷健策騎籌逾200萬
為傷健人士提供策騎課程及培育殘奧馬術運動員嘅香港傷健策騎協會（RDA）日前舉行周年慈善舞會，派對籌委會主席係百利建集團董事總經理陳正欣，當晚籌到二百幾萬元善款。
有機會獲選出戰今屆殘奧馬術比賽嘅曾青氣賜同謝佩婷上台致詞，佢哋都係曾患腦積水同腦缺氧嘅早產兒，睇嘢、講嘢或行路都十分吃力，但佢哋以幽默輕鬆語氣描述加入RDA而重獲新生嘅故事，令賓客為之動容。
仁愛堂前主席史立德就以逾二十萬元投得全球搶先發售嘅新款名錶同飛機師外套，仲好貪玩即刻着上身，朋友同仔女爭相拍照，引起小騷動。
史立德（左一）着上當晚投得嘅機師外套同靚錶，與太太（左二）齊擺pose畀囝囝及粉絲們影相。
國泰航空企業事務董事莊偉茵在舞會上獻唱。
陳正欣（左）同郭少明齊撐慈善舞會。