政壇：葉劉攞料踩徒弟能力差

新民黨主席葉劉淑儀尋日喺立法會提出有關特首辦人手開支嘅質詢，發現原來特首辦喺二○一一至二○一二年度嘅薪酬開支，相比九七至九八年度增加約三成，至四千九百三十七萬元，人手編制亦由六十多人增至逾百人，驟眼睇葉劉好似想揭示煲呔曾接管特首辦後變「大花筒」，但原來佢係一石二鳥，繞個圈質疑佢「徒弟」特首辦特別助理陳岳鵬嘅工作成效。

葉劉眼利，似係有備而來，質問局方喺增加人手後有乜嘢成效，對特首嘅民望以及同傳媒嘅關係有乜嘢改善等。政制及內地事務局局長譚志源回應話，增加人手後對特首辦工作有正面幫助，但工作成效就好難量化，而新媒體例如facebook嘅工作，對特首辦同各界聯繫起了幫助。

話說葉劉上幾個星期已經喺報紙專欄暗插陳岳鵬過檔去特首辦，今次再轉戰立法會繞個圈質疑呢位「徒弟」嘅工作能力，似乎當陳岳鵬係叛徒多啲。