政壇：死攬建制派 煲呔曾公審腳軟

本報連日揭發煲呔曾貪盡富豪提供嘅海陸空豪華款待，但佢一直死撐話跟足自訂嘅規矩辦事，更賴時代轉變同市民道德標準高咗，認真無恥。煲呔曾今日就會赴立法會答問大會接受議員最嚴厲嘅質詢，據聞佢「行刑」前騰雞兼腳軟，令特首辦「發功」急Call建制派保駕護航。如果好似建仔之流嘅建制派今日放軟手腳放生煲呔曾，等於斷送香港四十多年來廉潔嘅核心價值，相信眼睛雪亮嘅市民，喺九月立法會選舉勢必要佢哋「票債票償」。

《太陽報》及《東方日報》連日獨家踢爆煲呔曾「曾商勾結」醜聞，包括乘搭富豪私人飛機到泰國布吉度假、坐豪華遊艇過澳門、仲出席賭場春茗，甚至租住富商提供豪華裝修嘅深圳「禮賓府」，惹來全城嘩然，但佢一直以「唧牙膏」方式回應疑團，令各界有理由懷疑佢係身有屎，因此大家都金睛火眼(目及)實一眾議員點樣盤問煲呔曾，勢必令答問大會「火花四濺」。

包庇勢遭選民唾棄

據聞煲呔曾打聽到議員會對佢嚴厲質詢，即時腳軟要求特首辦「使橫手」打電話畀班建制派議員連問多個問題，包括會否出席答問大會、屆時會否問問題、甚至巨細無遺收集議員會提問邊一方面嘅問題等，明眼人一睇就知特首辦此舉根本等於向建制派議員施壓，希望佢哋到時「小罵大幫忙」，或者問埋啲無厘頭問題，甚至幫煲呔曾解畫，否則就唔好發問。

我哋睇過立法會秘書處嘅資料，較少喺答問大會上提問嘅議員多數都係建制派，而霍震霆就更加有優先權，所以係咪排得到泛民主派議員提問真係好難講。不過，議員嘅天職就係為民請命，特別係要參加直選嘅建仔，到時唔好問埋啲不着邊際嘅問題蒙混過關，以圖放生煲呔曾，否則九月立法會選舉只會被市民用選票唾棄，所以建制派議員應該諗清楚係咪仲要包庇煲呔曾呢個負資產。