鮑魚黨橫行宰客 旅遊業隱患叢生

好事不出門，醜事傳千里！大家聽到呢句話，係咪會聯想到曾蔭權同唐英年？冇錯，佢哋一個「曾商勾結」，一個「謊唐僭建」，唔止搞到特區官場臭崩崩，仲成為國際醜聞添！

上樑不正下樑歪，高官權貴一個接一個巧取豪奪，啲奸商咪有樣學樣囉。嗱嗱嗱，香港出現劏客「鮑魚黨」，無良奸商光天化日宰客，既狼且辣，受害嘅包括台灣同胞，所以咯喎，臭名昭彰到連台灣官方機構陸委會都要發特別公告，點名批評，真係影衰香港。

鮑魚黨點樣劏客呢？嗱，橋唔怕舊，最緊要受。無良奸商聲稱每包鮑魚賣二百幾蚊，到顧客碌卡畀錢，一睇銀碼即刻嚇呆，原來售價以両計算，埋單要成四千幾蚊，兩個價錢相差達十五倍。

喂，煲呔曾呢件劣質特首，香港人用咗七年，發覺唔妥都要求退貨啦，搵笨鮑魚唔要得唔得呀？唔好意思，鮑魚已經切片，顧客非買不可。一句講晒，明屈！陸委會陸續接到投訴，向民眾發出警示，提醒在港小心購物。

港府呀港府，聽到陸委會嘅公告，覺唔覺得面紅呢？人哋高調批評鮑魚黨，何止係對台胞嘅警示，更加係對香港旅遊業嘅警示，劏客問題臭名遠播，已經令購物天堂蒙污。

叮佢個鎯鎯！話時話，鮑魚黨橫行劏客，商賊巧取豪奪固然不容姑息，港府執法無力，變相縱容，更加抵鬧。黑店「以両代斤」劏客已經唔係新聞，無良奸商喺眾目睽睽之下欺詐遊客，居然橫行香江，長做長有，真係講都冇人信。

千里之堤，毀於蟻穴。旅遊業係香港四碌經濟支柱之一，近年不斷被蠹蟲侵蝕，劏客醜聞早已名揚神州，家陣連台灣都出埋名，小心碌柱有日崩塌呀！

咦，係喎，煲呔曾都係「鮑魚黨」嚟喎。佢同富商呼朋結黨，坐遊艇豪遊澳門，歎盡玩盡，聽講仲有貴價紅酒飲，有頂級飽魚食。港府一哥同富商權貴終日吃喝玩樂，身為前二哥嘅唐唐就沉醉於酒池肉林，搞到政事日非，鮑魚黨橫行猖獗，旅遊業隱患叢生，有乜出奇？

即係咁，各位港府官僚如果唔想同鮑魚黨一樣臭名遠播，唔該快快打擊宰客黑店，萬一搞到台灣同胞嚟香港都要加入遊行抗議作餘興節目，咁就該煨咯！