政壇：巴士阿叔參選派2.8萬億
「巴士阿叔」陳乙東曾參加過特首選舉，但最終因提名唔夠，閘都入唔到，但佢尋日又話參選，仲擺咗條短片上網，聲稱已獲建制派嘅建仔、富貴黨同新民黨三大政黨支持做佢內閣。
嘩！講到似層層。除有強大政黨做後盾外，佢亦有好強嘅治港理念，話要全港滅貧，唯一方法係效法澳門嘅現金分享計劃，而且要做更大規模，建議每人派四十萬元，分四年領取，等香港人可以做吓小生意，同屋企人去吓旅行咁，唔使成日掛住返工，咁樣港人先可成為最幸福嘅市民喎。香港有七百萬人，如果每人派四十萬元，即係派二萬八千億元！如果佢真係做到特首，睇怕納稅人要申請移民至得喇。