政壇：張永霖睇曾商勾結跟民意
尋日有團體到禮賓府請願，鬧爆「曾商勾結」兼且要求煲呔曾落台，咁啱喺馬場遇到香港大學專業進修學院校董會主席Linus張永霖夫婦，為老友中信泰富前董事總經理范鴻齡有份擁有嘅團體馬「高耀之寶」撐場。問Linus點睇「曾商勾結」，佢就笑笑口答話：「市民大眾點睇我咪點睇囉，我同市民大眾嘅觀感都係一樣！」咁講即係唔信煲呔曾清白囉！
另一邊廂，太子珠寶鐘錶主席Jimmy鄧鉅明嘅愛駒「閃耀之星」首次奪魁，姐夫朱繼陶同老友愛沙尼亞共和國駐港名譽領事Matthew林建康都戥佢開心。今次係Jimmy人生中首次拉頭馬，表現雀躍，笑言會將拉頭馬張相裱起喎。
張永霖（右）專程去為老友范鴻齡有份嘅團體馬打氣，期間暗示同市民睇法一樣不滿煲呔曾咁貪。
鄧鉅明夫婦（左三及左二）首次拉頭馬，姐夫朱繼陶（左一）、老友林建康伉儷（右二及右一）齊舉勝利手勢。