地政署貪財迫遷 物流業無處安身

強拆迫遷呢家嘢，內地就聽得多，港府居然有樣學樣，五十年大限未到已經實行「一國一制」，背信棄義，與民爭利，令合法租戶淪為港產拆遷戶。

件事係咁嘅，本港土地矜貴，物流用地更加係長期供不應求，業界往往要租用政府土地存放貨櫃同處理貨物。租約一般三年，到期續租，通常為期兩年，前後可租五年，既方便物流業營運，又可以畀承租人有足夠時間回本。運輸及房屋局局長鄭汝樺亦應承過，會因應情況將合適土地嘅短期租約延長至五年。

點知當局講一套做一套，反口覆舌唔認數。呢，地政總署近日突然反臉，唔再為葵青區四幅已租出三年嘅土地續約。有物流公司投資咗二百幾萬元平整土地、添置設備做貨櫃場，原本諗住可以做到二○一四年，點知當局出爾反爾取消續約，限期今年五月要交番幅地。

叮佢個鎯鎯！人哋真金白銀投入，淨係將一幅爛地變成貨櫃場已經用咗半年，期間白交租金，有出冇入，家陣啱啱用咗兩年幾，地政總署打完齋唔要和尚，土地話收就收，租戶之前投入嘅成本統統化為烏有，你話唔揼心就假。正如業內人士話齋，當局簡直就係「強搶民產」！

話時話吖，平整好嘅地收番之後，即時可以重新招標收取更高租金，當局過河拆橋，坐享其成，分明就係搵笨；租戶唔止失晒預算，更加血本無歸，慘況同內地拆遷戶有得揮。地政總署咁陰質嘅嘢都做得出，不如索性向內地衙門睇齊，改名做「特區國土局」吖，笨！

同樣係呢班官僚，收回貨櫃場鬼咁積極，對保護環境就懶懶閒。嗱，本港最南端嘅蒲台島擁有大量生態旅遊資源，本報踢爆近排島上出現大規模懷疑違規發展工程，變成千墳島，離島地政處竟然漫不經心，連有關工程係咪違規發展，當局有咩跟進行動都講唔出，簡直不知所謂！

物流業係本港經濟支柱之一，生存空間正不斷縮窄，港府無視業界困境，唔肯提供協助，仲要落井下石，將業界趕上絕路，唔官逼民反至奇。有物流業團體聲言，如果當局堅持取消續約安排，會發起一百架貨櫃車大遊行。咪話太一叮唔提醒，如果當局一意孤行繼續迫遷，因住隨時爆發港版「烏坎村事件」吖，叮！