CULTURE噏：男妝革命

今次我們找來學化妝一年多的Felix，分享對男士化妝的看法。

「愛美是女人的天性﹗」此話已不合時宜。他，坐在化妝桌前，在淡黃的燈光下，左手按着眉頭，右手拿起眉筆，一筆，一畫，一掃，一抹，再拿起旁邊的遮瑕膏，左一塗，右一塗，將臉上的瑕疵逐一修飾。誰還敢說貪靚是女性的專利？

近年，不少年輕男士悄悄起「化妝革命」。他們讀化妝、逛化妝品店、出街、返工前都會先化妝。對他們而言，化妝可改善形象，提升自信心，令人看起來特別醒神。見到他們，你就會明白化了妝的男士，只是尊重場合、尊重自己，絕非女人型！

「化妝就好似畫figure，男仔一樣做得到。」

Felix從事產品生產，約兩年前，他有感工作沉悶，因而萌生轉行念頭。思考前路時，他腦海突然湧現朋友的一席話：「有次一個朋友見到我喺度畫figure，話我畫得好細緻，好似喺度幫人化妝咁！」一言驚醒夢中人，Felix知道自己細心的優點，正是化妝行業的要求之一，雖然對化妝一竅不通，但想嘗試新事物，故報讀化妝課程，踏上男化妝師之路。

最初，Felix對化妝毫無認識，「邊支畫眼，邊支畫眉，都分唔到！」除了向女性朋友請教，還不斷從實戰中學習。於是，Felix找自己做試驗品，平日化妝出街，慢慢成為了習慣。「化完妝，個人睇起嚟精神啲、乾淨啲，覺得幾好呀！」Felix認為，男士化妝較女士化妝簡單，只會塗粉底、修眉、畫眉，或用遮瑕膏遮蓋黑眼圈、暗瘡，「其實只要淡淡哋，唔太誇張，男仔化妝完全無問題﹗」

「化妝係一種禮儀，一種尊重。」

原來，Felix亦曾經對化妝的男士有誤解。「以前見到佢哋，會諗點解男仔都咁貪靚o架？覺得好奇怪！」不過，當他學識化妝後，發現化妝也是一種禮儀的表現，「唔只為貪靚，化妝係代表你想以最佳一面示人，表達對人同場合嘅尊重。」

他表示，現時愈來愈多工種要面對客人，年輕男士化妝已日漸流行，「其實，男仔同女仔一樣，塊面一定會有瑕疵，需要用化妝品去修飾。」學化妝超過一年，Felix發現自己對化妝的工作愈來愈有興趣，更有意成為全職化妝師。「雖然有人認為男化妝師，會有啲尷尬或者唔方便，但我哋擁有對女性嘅審美觀，呢個係我哋嘅優勢。」