政壇：搞搞政：怪醫唔破例拒提名葉劉

特首候選人唐英年被踢爆喺九龍塘豪宅僭建地下王宮，事後大話連篇，誠信破產，最新嘅民調顯示佢唔單止民望插水，仲衰到連小朋友都唔想揀佢。做過保安局局長嘅立法會議員、新民黨主席葉劉淑儀隨即宣布參選，連日搏命搵人提名，立法會醫學界代表梁家騮尋日透露，佢都收到葉劉嘅拜票要求，不過怪醫請咗葉劉食檸檬！

特首選舉嘅提名期仲有幾日便屆滿，葉劉打鑼咁搵人提名，立法會同事當然係最佳途徑之一，怪醫尋日出席個活動後透露，葉劉曾經接觸佢，希望佢提名自己，但怪醫話，唔想違反當初醫學會唔會提名任何候選人嘅承諾。不過，另一邊廂嘅葉劉卻話，原本冇打算提名嘅醫學會都口風有鬆動，願意考慮提名佢，佢嘅口徑明顯同怪醫有異，唔通暗示另有醫學界選委考慮提名佢？

講番葉劉，有市民投訴佢涉嫌濫權叫入境處舊部幫手，幫人申請護照快證，標榜自己有好高道德標準嘅葉劉否認有關指控，個投訴涉及港大職工會理事長朱記東，葉劉承認認識朱記東，但否認曾經濫權幫佢嘅家人辦快證。