政壇：陳文綺慧紅色旋風籌款
東華三院前晚喺尖沙咀洲際酒店舉行慈善晚會，一眾董事局成員響應「Red Night」嘅紅色主題，為旗下廣華醫院籌募擴展服務經費，成功籌得二百多萬元。當晚一眾董事局成員響應紅色主題，主席張佐華以紅頸巾嘅上海灘造型搶鏡，總理馬陳家歡、曾楊淑貞、黃業光則分別着上鮮紅色長裙、斗篷及煲呔，盡展紅色魅力。籌委會主席陳文綺慧就穿上一襲雪紡白色長裙配紅腰帶，紅得好巧妙。
問到陳太近來忙緊乜，佢笑言近期忙於追看「八卦」新聞，梗係啦，關乎香港嘅未來喎！另一個關心城中大事嘅仲有副主席施榮恆（Ivan），佢同太太恩愛現身，Ivan話佢上星期去完上海公幹，忙到連報紙都冇時間睇，佢身邊嘅施太仲笑笑口話，老公連新民黨主席葉劉淑儀參選特首都唔知。
近排爭睇新聞嘅陳文綺慧（左），日前一襲雪紡白色長裙配紅腰帶出席晚會。