政壇：煲呔曾無恥題「篤誠惠民」
煲呔曾以權謀私、貪得無厭，乘坐富豪遊艇同私人飛機旅遊，仲密謀退休後租用富商名下嘅豪裝大屋被東方報業集團踢爆後，引起全城怒吼，今日就有多個團體發起遊行，要求煲呔曾問責下台。不過，厚顏無恥嘅煲呔曾卻唔知衰，碰巧日前出版嘅新一期《公務員通訊》封面竟然係佢題字「篤誠惠民」，貪官叫下屬誠心為民服務，真係荒天下之大謬。
《公務員通訊》係由公務員事務局負責編製嘅，該局局長俞宗怡（D姐）早前先至大義滅親，高調發稿詳述公務員嘅防貪守則，暗寸煲呔曾嘅操守連基層公務員都不如。今次煲呔曾嘅題字又戲劇性成為公僕通訊封面，係有心柴台、諷刺煲呔曾口不對心？定係咁啱呢，不過，佢哋有冇諗過連利是仔都唔敢收多封嘅基層公僕，收到呢份眼冤通訊，會唔會燒咗佢o架？
新一期《公務員通訊》封面竟然印上貪得無厭嘅煲呔曾「篤誠惠民」題字，認真無恥。