職業安全搞不好 吸納工友有難度

世上無不勞而獲，如果閣下唔係出生大富之家，又或者不屑做一個吊吊揈嘅二世祖，通常讀完書就會搵嘢做。咁做乜好呢？吖，不如投身建造業啦！特首參選人唐英年嘅地下王宮驚世曝光，全城哄動，話唔定大把權貴爭相倣效，大興土木，到時建造業想窮都難咯！

嗱嗱嗱，講笑咋，僭建係違法嘅，如果唔係，唐唐都唔會淪為全城狠批嘅人肉箭靶。實情係，建造業人手緊張、青黃不接，港府打算以銀彈政策吸納新血入行就真。

係咁嘅，預算案建議撥款二億二千萬元，畀建造業議會增加訓練名額同津貼，業內人士透露，港府打算為建造業學員加津貼，由現時五千蚊加到八千蚊，判頭另獲贈五千蚊薪金。換言之，學員培訓期間可得最高一萬三千蚊薪水，紮鐵同釘板等七個工種受惠，最快由下月起推行。

地盤工友日曬雨淋，付出體力汗水，可以攞到更多津貼，梗係好事啦。尤其本港多項大型基建陸續上馬，萬一建造業人才凋零，唐唐之流嘅高官權貴建唔成地下王宮事小，香港經濟發展被拖慢事大！

問題係，港府泵水加津貼，建造業人手斷層問題係咪就得到解決呢？如果勞工官僚真係咁傻咁天真，咁就應該接受再培訓嘞。

年輕人對建造業卻步，人工固然係考慮之一，但歸根究柢，行內工業意外率居高不下，嚇到冇人肯做先至係主因。以一一年為例，行內工業意外嘅致命個案就較一○年暴升咗百分之一百四十，死亡率為每千名工友有零點四宗，比英國高出十七倍。建築地盤變龍潭虎穴，情況唔改善，加幾多人工都一樣趕客o架咋！

泥水佬開門，過得人過得自己。各位港府高官，好話唔好聽，如果你哋對職安問題闊佬懶理，激到班立法會議員對你哋掟蕉都係小兒科，如果有人不忿掟鋼筋同士巴拿，咁就後果嚴重嘞。職業安全咁無保障，相信做緊工友嘅都想轉行，想話吸納新血當然有一定難度啦，吓話？

一句講晒，建造業職安問題必須諗辦法改善，如果勞工官僚繼續關人個關，咁冇膊頭，咁冇腰骨，小心好似唐唐咁，成為全城聲討對象呀，叮！