政壇：政商定格：林鄭跟發叔輸錢當做善事
沙田馬場尋日舉行鄉議局盃，曾經喺新界村屋僭建問題同鄉議局有過過節嘅發展局局長林鄭月娥都獲邀出席，仲同主席劉皇發同枱食飯。
林鄭亦有落注玩吓，佢笑笑口咁話唔係好識睇馬，諗住跟發叔買番隻，點知賽果出乎意料，輸得乾乾淨淨，但好彩佢只係象徵式買咗二十蚊啫。佢話入得馬場就當然要貢獻吓畀馬會，咪當做善事囉。
發叔都自認眼光差少少，但都貼中咗第二同第三名。問到今次請林鄭嚟做嘉賓，會唔會覺得尷尬，私底下係咪好老友？佢就神情輕鬆咁話：「公還公、私還私，大家都係為個社會做事啫！」
轉頭見到恒生銀行副董事長兼行政總裁梁高美懿同老公，跟住又見到渣打香港行政總裁洪丕正，「恒生一姐」同「渣打一哥」前後腳入馬場，時間相差唔夠二十秒，唔知佢哋係咪一早約埋食飯，順便交流吓業界行情？
發叔（前右）及太太劉吳妹姝（前左）請林鄭月娥（前中）入馬場，後左為發叔囝囝劉業強，後右為鄉議局執委陳東岳。