政壇:搞搞政:陶君行攬住個桔重新上路

喺區議會選舉帶領社民連「Total loss」後,陶君行辭去主席一職,只係保留行委身份。但咁搞法令到佢近期曝光率大跌,好多市民都差啲遺忘咗佢,直接影響佢選立法會嘅聲勢,最近佢班黨友就諗到條好橋,幫佢重新上路。

社民連今個月二十五號舉行九東支部改選,現任主席姜新華講明唔會連任,希望由第二啲黨友試吓。而好多兄弟都覺得,九東支部應該幫阿陶全力助選,所以由阿陶做最合適。阿陶就同我哋講,話自己未做過支部主席,所以都有興趣,而且唔算食回頭草,唔怕畀人話好肉酸。

由於阿陶唔再係區議員,連一塊街板做宣傳都冇,所以做到支部主席,總算執番個桔,第日可以多啲機會曝光同發言。阿陶仲話依家仍考慮緊出唔出戰立法會,但近日評估過形勢,覺得一班街坊對佢仲有少少感情,有啲仲覺得佢輸咗好慘,所以唔排除有同情票喎!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白