政壇：蘇菲唔選拒益富貴黨

本身係富貴黨嘅「蘇菲」梁劉柔芬喺○八年贏咗立法會選舉後，因黨務問題，同林健鋒、梁君彥等人另組經濟動力。但舊年佢哋又重組成工商專聯，打算喺選舉協調上同富貴黨有傾有講。聽聞蘇唔想再競逐連任，外界都覺得會由近年加入富貴黨嘅鍾國斌頂上。

但據聞蘇菲死都唔肯益富貴黨，原因係○八年立法會選舉時，鍾國斌已經用獨立身份挑戰佢，雖然鍾國斌最終輸咗，但蘇菲贏得唔多，呢條刺就一直插喺佢心中多年，所以就算鍾國斌入咗富貴黨，算係「半個自己人」，都唔諗住畀佢上位。

蘇菲仲打算要搵自己友接棒，佢就係香港紡織商會榮譽會長陳亨利，陳亨利知名度唔算高，但喺業界有一定江湖地位，做過兩屆紡織商會會長，亦做過保良局主席、和平統一促進會副會長等公職，但就未加入經濟動力。如今蘇菲打算畀「街外人」上位，睇嚟佢對富貴黨真係冇情講。