政壇：以偏概全撐內地人 德成局長引火自焚

雙非孕婦湧港、名店禁拍風波，繼而有北京學者罵香港人係狗，連串事件激化內地人同香港人嘅矛盾。民政事務局局長曾德成學人「撲火」，尋日喺網誌「局長隨筆」內，力撐內地人高質素過以前。

德成局長以「內地遊客之量變與質變」為題，揮筆直書。佢舉咗兩個例子，指有朋友近日到訪內地遊客眾多嘅尖東海濱花園，以檢查衞生嘅眼光巡視地面，但「一路看不見地上有垃圾」，到好遠先發現地面有一片紙巾，街道異常乾淨，想證明嘅係內地同胞都唔係到處拋垃圾。

搞和諧大細超

可能一個例子未夠力，跟住佢又引述曾有朋友搭地鐵，起身讓位畀佢嘅係一位年輕嘅內地女子，並非香港人，證明內地人有禮喎。

就以呢兩個例子，德成局長認為港人決不可以偏概全看待事物，以個別事概括七百萬人固然唔啱，用嚟概括十三億人，即係內地同胞，偏差就更大嘞！佢仲話港人推崇的獅子山精神中，最重要係同舟共濟、平等待人，而前提係要有包容嘅人，求同存異咁話。之不過，聽完兩個例子，認真啼笑皆非。第一，尖東街道一塵不染，應記一功嘅同應讚嘅係清潔工人先啱。第二，地鐵偶一為之有內地人讓座，點都抵唔番十個內地人喺地鐵大小便、大吃大喝。

德成局長一邊叫港人唔好以偏概全睇事物，轉頭就以「單一例子」撐內地人，明顯「大細超」。唔通喺佢眼中，京城月亮真係特別圓？雖然佢嘅職責係要搞和諧，但最怕市民聽完佢講之後仲火滾，佢救火降溫不成，燒埋自己添！