驗車證使錢就掂 自駕遊隨時攞命

自駕遊禍港，借用最新潮語講法，情況沒有最壞，只有更壞。唔係靠嚇o架，嗱，就算內地同胞將本港交通規則倒背如流，開車循規蹈矩，一樣可能爆大鑊。

係人都知，車輛要檢驗合格至可以揸出街，表面睇，呢樣嘢內地同本港冇乜兩樣。弊在內地驗車兒戲過細路仔玩泥沙，有錢使得鬼推磨，驗車合格證用錢就可以買到，就算係溶溶爛爛嘅「錢七」，唔使檢驗照樣過到骨，問你服未！

呢，本報記者直闖深圳車管所，經過明查暗訪發現驚天大秘密。原來只要透過蛇仔，六百蚊人仔包攞到驗車合格證。驚架車殘過頭檢驗肥佬？冇有怕！就算開唔郁嘅殘車，只要畀兩千三百蚊，一樣可以「起死回生」，甚至連車都唔使睇就可以過關。

車管所除咗驗車，居然肥水不流別人田，連修車都撈埋，而且設備齊全，有乜唔妥當場整番掂。但眼尖嘅記者發現，有啲「維修」緊嘅車，死氣喉同車頭燈仍然有問題，就話檢驗合格。梗係啦，發證係佢，驗車係佢，修車又係佢，即係又做球員又做球證，點會自己難為自己吖，唔怪得車檢合格率咁高喇。

叮！咁嘅車檢直頭係靠害。正如理工大學機械工程學者話齋，如果煞車系統有問題冇驗出，好容易釀成意外；車架生銹冇發現，隨時可能甩車架。你話嘞，如果畀呢啲甩頭甩骨、隨時失控嘅隱形馬路殺手參加自駕遊，長驅直入香港，係咪死得人多吖！

總而言之，自駕遊隱患多多，港人憂慮重重。本報踢爆自駕遊禍港五大死症，包括難以核實申請人身份、車輛來港造成路面擠塞、污染惡化、執法困難、索償無門。加上內地驗車求其是但，發牌漏洞處處，唔驚就假。

運輸及房屋局局長鄭汝樺尋日回應議員質詢時又係三幅被，話兩地私家車相互過境自駕遊有「高度規範性」，先少量批准，再循序漸進。佢仲拉埋立法會做擋箭牌，話必須立法配合，由立法會把關喎。

唔使擺立法會上枱嘞，其實問題關鍵係港府冇進行諮詢、冇做好配套措施，罔顧中港矛盾不斷惡化，企圖霸王硬上弓。咪話太一叮唔提醒當局，一意孤行必撞板，小心車毀人亡，自駕遊變成政治自殺遊呀，叮！