政壇：鐵頭仁反串官員覆自己
全城對港府倡議嘅自駕遊反應好差，白鴿黨嘅鐵頭仁尋日都喺立法會提出一項有關自駕遊嘅質詢，不過呢位特首候選人尋日表現卻游魂咁，提出質詢時讀錯咗官員嘅回覆，到底佢係角色錯亂，定係有心試吓做官嘅感覺呢？
鐵頭仁原本諗住喺立法會問運輸及房屋局局長鄭汝樺（Eva）有關自駕遊的實務安排，仲一早預備好一個寫住「停」嘅路牌送畀Eva，諗住叫政府要快啲煞停自駕遊，點知鐵頭仁讀錯咗局長個回覆，一開口就話自駕遊係一次性特別配額，而廣東省私家車來港嘅安排屬於第二階段嘅試驗計劃，讀咗成半分鐘，至發覺有啲唔對路。
佢恍然大悟發現自己讀錯稿後，至即刻同主席講自己講錯嘢，從頭嚟過。雖然及時修正，但鐵頭仁呢招忽然反串官員都顯示佢唔夠專注噃。
鐵頭仁尋日喺立法會游魂，提出質詢時讀錯咗官員嘅回覆。