政壇：洪丕正當年發紀念鈔頭痕
中銀發紀念鈔，喺香港掀起一片炒風。尋日渣打香港搞春茗，一眾高層都有出席，行政總裁洪丕正（Ben）喺○九年都發行過150周年紀念鈔，當時都一肚苦水，佢話自己冇特權，而有位朋友拍佢膊頭叫幫吓手啦，最終都幫唔到，但個朋友唔知係咪誤會阿Ben耍佢，托佢手，結果三年嚟都冇搵過阿Ben食飯。
雖然係咁，阿Ben當時都搵秘書、親朋戚友分頭行事，加埋抽到鈔票但最終放棄嘅同事，加加埋埋都湊夠三十張套連張特別版。唔好以為佢作私人珍藏，查實只係遇到慈善活動叫佢贊助禮物時，阿Ben就會攞張出嚟，當捐贈禮物。
