《太陽報》精益求精 售正價物超所值

太一叮今日撇開家事國事天下事，暫時唔叮衰人賤人硬膠人，同各位閒話家常傾傾偈。有乜偈好傾呢？傾吓《太陽報》嘅日常工作咁囉。

《太陽報》嘅日常工作其實好簡單，四個字講完：精益求精。之所以要做到精益求精，答案亦係好簡單，令到讀者覺得付出六元買一份報紙係物超所值嘅。

冇錯，《太陽報》今日起恢復正價售六元，太一叮除咗要多謝讀者捧場，亦要話畀大家聽，你哋嘅選擇絕對明智。首先，恢復正價嘅同時，一連七日隨報附送二元百佳現金券，讀者憑券去百佳超級市場購物可以享受兩蚊優惠。你話嘞，表面上係畀多一蚊，實際上係慳番一蚊，即係四元就可以買到一份咁精彩嘅《太陽報》，唔係超值又係乜呢？唔好話太一叮賣花讚花香，如果一朵花確係好香嘅時候，你唔去讚一讚，對唔住嗰一朵花囉！

其次咯喎，物超所值嘅感覺來自《太陽報》多采多姿嘅豐富內容，呢家嘢正正就係精益求精嘅日常工作。話畀大家知吖，報館員工每日絞盡腦汁就係要令到版面夠活潑、標題夠醒目、資訊夠詳盡。

提到版面，太一叮敢誇口講一句，《太陽報》係全港最有年輕活力嘅一份報紙，絕對唔會令人有沉悶嘅感覺。如果大家有留意，一定會發覺年輕化嘅版面有一個特色，就係內文全橫排，閱讀起嚟十分方便。你知啦，人眼係左右並排吖嘛，而數目字同英文字又係由左到右，內文全橫排對於視覺而言係非常User Friendly嘅。

至於內容咯喎，當然係緊貼時勢快靚正。舉一個例子吖，二月十四日情人節快到嘞，《太陽報》觸覺敏銳嘅記者即刻做咗一個專題報道，二月九日頭版頭條踢爆不少所謂情趣安全套其實問題多多，部分一拉就斷，甚至穿窿漏水，隨時害到男歡女愛搞出人命。

除咗頭版猛料之外，其他版面都好精彩o架，好似「Sun微博」咁吖，既有創意澎湃嘅惡搞，又係一針見血嘅專欄，睇到讀者眉飛色舞。順帶一提，ontv東方電視評論台即將推出《就係咁爆》，讀者可透過智能手機下載「東方互動」app，於「爆料」項上載影片。

讀者眼睛係雪亮嘅，正正因為《太陽報》物超所值，所以銷量穩佔全港強勢第三位，讀者人數高達一百六十三萬四千五百，比○八年勁升百分之二十六點一，唔到你唔服。

好嘞，閒話家常完畢，請各位轉去其他版面繼續享受無與倫比嘅閱讀樂趣，多謝捧場！