SUN熱辣：家品清潔劑 糖衣陷阱

家居用品包裝得愈美觀，變相為兒童製造更多中毒機會。現時不少家居產品均設計新穎，部分與糖果相似，更配上果汁香味，令人真假難分，卻暗藏危機。本報將一些坊間啫喱狀防蟲貼，糖形唇彩及包裝甚似果汁的盆栽肥料等交予生化專家檢測，發現有關產品都含有不同成分的化學物料，兒童一旦誤吞，輕則屙嘔肚痛，重則灼傷喉嚨及腸胃，倘未及時發現，更有奪命危機。

現時家庭產品花款百出，部分設計與糖果極為相似，配上濃烈的果汁香味，令人真假難辨，早前便有小童誤吞潔廁啫喱，又有將暖包當芝麻糊沖劑服食中毒。本報於市面上搜羅多款設計與糖果十分相似的家庭用品，當中包括防蟲用品、唇彩、飼養魚類的空氣珠、盆栽肥料及礦石，還有一系列的清潔劑。它們外形別出心裁，視覺上亦非常養眼，不過這類產品卻有一個共通點，就是各有潛在毒性，部分包裝上，亦貼上兒童切勿觸及等警告標語，顯示產品有一定危險性。然而，這些毒物分布全屋，家長一旦「睇漏眼」，隨時鑄成大錯。

灼傷腸胃骨更喉窒息

本報將有關產品交香港城市大學生物及化學系副教授林漢華檢測，結果發現該批產品都含有不同種類的毒物，會影響小童的身體及神經系統。林表示，產品中以清潔用品危機最大，因為產品以高濃度酸鹼來清理污漬，如小童誤吞，無論酸性或是鹼性都會灼傷口腔、喉嚨及腸胃。

至於一款以膠樽包裝的花肥，檸檬黃的顏色十分吸引，林漢華表示，花肥成分主要是尿素及氮肥等肥田料：「其實呢啲都係肥料嘅一種，就好似人嘅排泄物都可以用嚟施肥，小童食咗未必死得人，但屙嘔肚痛一定唔少得。」另外一款水凝啫喱狀的肥料外形圓碌碌猶如啫喱糖，亦容易被小童誤服。

「睇落成粒啫喱糖咁，顏色又咁靚，好容易令小朋友以為係糖果攞嚟食。」除了肥料可致肚痛外，林更擔心水凝膠的尺寸與波子相若，若小童吞下，可能會骾塞喉嚨甚至窒息。林又發現，產品顏色奪目，所用的色素亦令人擔心。「呢啲產品肯定係化學色素及香料，肯定唔適合人食。」

港家長安全意識低

本報曾於街頭進行一項小型調查，將產品交攜有家長陪同的小童檢視，有三歲小童一眼就認定產品是糖果。不少家長都表示，家中會少使用這類外形類似糖果或食物的產品，寧願購買外形較醜或不起眼的產品，避免小童誤吞。

香港防止虐待兒童會總幹事何愛珠指，本港家長對家居的安全意識仍然偏低，疏忽家居擺設可能對小童構成危險。「如果家長抗拒唔到啲外形獨特嘅產品，要買嚟放喺屋企，就一定要保證擺放位置係細路仔見唔到，攞唔到嘅地方，如果唔係不如唔好買。」

對於家居產品設計幾可亂真，消費者委員會發言人表示，若家居購入有關產品，必須擺放一些兒童接觸不到的地方，避免小童好奇吞下。

家長有話說

鄧先生 （自僱人士）

「我屋企冇呢類型嘅嘢亦唔會買。我唔擔心個女會拎嚟食，因為佢細個嗰陣，我已經教佢唔好咩都放入口。」

蘇太 （家庭主婦）

「我一定唔會買呢啲產品，因為個女太細，都驚佢唔識分，以為嗰啲嘢真係食得。」