政壇：搞搞政：平叔寸唐唐批80後不智

特首參選人唐英年亂噏嘢常惹禍，一句批評八十後青年嘅「車毀人亡論」更成為早排考評局畀應屆中學文憑試考生嘅練習卷問題之一，聽講唔少考生答到媽媽聲。尋日已轉任大學訪問教授嘅前問責高官王永平都畀學生要求答呢題，條題當然難唔倒平叔，佢仲趁機寸唐唐呢番說話好不智。

平叔教路話，答呢條題先要回答唐唐點解咁講、講法係咪正確，政府有冇自我反省。不過，答題目都要有個結論，平叔就話︰「最簡單嘅結論係話我覺得佢（唐唐）不智囉！」講開唐唐又有單瘀事，事關電台娛樂節目主持查小欣早排訪問咗梁振英，原來查都邀請唐唐上去，但唐唐拒絕，點解放棄呢個接觸市民嘅好機會﹖唔通擔心畀查小欣問感情缺失同私生子傳聞？

平叔尋日又大講通識科嘅重要性，話孔子時代都唔係齋讀書，想通識科高分最緊要了解時事，睇吓周圍發生緊乜嘢，佢又寫包單話，學好通識嘅話，無論升大學、搵工面試都冇問題，如果有同學將來中、英文同通識都叻，但搵唔到工嘅話，就去搵佢喎，「我保證有工畀你做！」