政壇：鐵頭仁參選為住禮賓府
特首選舉嘅口水戰無日無之，有啲市民反而關心參選人嘅軟新聞，代表泛民參選嘅何俊仁（鐵頭仁）尋日出席一個電台節目，講吓太太、仔女，連結婚嘅蜜月旅行都唔介意同市民分享，不過，鐵頭仁都捉緊每分每秒宣傳嘅機會，仲透露太太曾經話，除非佢真係當選要搬入禮賓府，否則唔會理佢。
點解太太咁講呢？原來係佢今次參選，據講屋企人支持唔算踴躍，個仔都話佢參選係「攞嚟辛苦」，太太嘅反應咪係除非佢真係當選要搬入禮賓府，否則都唔會理佢，查實只係話唔理佢嘅政治活動，而唔係唔睬佢。鐵頭仁對於太太將佢一軍嘅話，就好幽默咁回應，如果佢做咗特首，都可以選擇喺現址居住㗎。鐵頭仁自爆唔識浪漫，結婚度蜜月都帶住書同原稿紙以便寫稿。
何俊仁自爆不懂浪漫，家事全由太太打理。圖為何氏夫婦在家中留影。