政壇：黑心煲呔曾咒歐債爆破禍港

內地有黑心食品，香港都有個黑心煲呔曾，快將執包袱嘅佢正事唔做，近日頻頻噏三噏四攪亂檔，尋日接受電台專訪時仲危言聳聽，詛咒香港隨時畀歐債危機拖累，聲言香港從未遇上咁凶險的形勢，又惺惺作態話，如果歐債危機要爆破，最好係喺佢任內出現，因為佢有經驗解決喎。如果係咁，佢都經歷及處理過沙士疫情，咁係咪想沙士重臨等佢解決吖？

打大鱷符碌搞掂

話煲呔曾黑心，絕非無的放矢，事關佢話歐債危機唔爆就當然最好啦，如果係要爆嘅話，一係就喺佢任內爆、一係就喺新一屆政府上任後，坐暖咗先去爆，總之千萬就唔好年中換屆時出事，否則對香港絕對唔係好事喎。佢仲認叻話：「我只係希望靠我哋自己以往儲埋嘅本錢，以及應付幾個金融危機嘅經驗，可以支持過去。」

佢扮惴惴不安，卻又好似恨不得烏雲密布香江咁。佢咁講係咪話事件喺佢任內爆發，佢就有能力處理吖？佢以為自己係邊個呢？如果佢想新一屆政府上場後先至爆，係咪存心想下屆政府死呢？點都好，言語間流露佢好想歐債危機爆發禍及香港，禍港禍民，真係夠黑心。

煲呔曾下巴輕輕話希望喺佢任內處理歐債危機，但回想金融風暴佢自詡打大鱷一役，好多講法都係話當時身為財爺嘅佢「符碌」搞掂，但其實過程險過剃頭，香港仲差啲喺佢手上斷送。對於黑心嘅煲呔曾扮晒惴惴不安，工黨主席李卓人就批評佢「得把口」，又似足評論員，講到好似自己置身事外咁。所以話呢，唔該煲呔曾自量吓，做番件好事，收聲當幫忙啦！