民望低殘賴港府 唐唐偉論正垃圾

咦，甩嘴金句王唐英年有進步喎，終於講到一句說話係叫做意思完整同邏輯清晰，最緊要係唔使結結巴巴不停漏口，都算難得咯！

但好可惜，唐唐呢句噏得咁順口嘅說話，唔單止冇為佢嘅特首選情加分，反而仲被人鬧爆添！到底佢講咗乜嘢咁乞人憎呢？佢話，民望低殘係因為市民不滿政府工作所致喎，仲話對呢個現象可以諒解添。

嗱嗱嗱，某程度上，唐唐講得啱㗎。市民聲嘶力竭反對佢做特首，理由多到數唔晒，好似話佢人頭豬腦嘅形象深入民心啦，「感情缺失」嘅污點搞到誠信破產啦，富二代嘅吊吊揈作風廢到無倫啦，詛咒「八十後」青年車毀人亡嘅嘴臉面目可憎啦，當眾甩鞋搔襪印印腳嘅失禮行為唔配做政治人物啦咁樣。但係，講到佢民望沉疴不起，又點可以唔提港府施政一塌糊塗呢筆帳呢？佢為官九年，其中五年仲係做政務司司長，港府工作不孚民望，唐唐絕對難辭其咎，叮！

港府表現不濟，民怨自動過帳唐唐，呢個係事實。之不過咁，唐唐將自己民望低殘同港府表現混為一談，唔係想負荊請罪喎。佢嘅說話意思完整，邏輯清晰，就係要卸膊，將自己不受歡迎嘅責任諉過港府！

冇錯，港府施政甩皮甩骨，搞到民怨沸騰，全港市民都可以理直氣壯口誅筆伐，但係唐唐就唔可以。喂，自己昔日有份喺熱廚房炒餸，依家除下圍裙，跑出嚟埋怨碟餸又酸又臭，搞到自己一身羶，荒唔荒謬啲呀！唐唐呢套過橋抽板嘅參選偉論，套用番佢自己嘅金句：完全係垃圾！

不過，垃圾都畀人當寶嘅，唐營大好友大表認同「唐垃圾」論調，指港府拖累唐唐選情喎。嗱，上次有人讚完唐唐「大智若愚」之後，唐唐即刻多咗個花名叫「唐弱智」，今次小心又變死亡之吻喎。

其實，唐唐民望尋底已成事實，點都扶唔上壁㗎啦。浸會大學爆出疑似暗助唐唐嘅民調「早洩」風波，被指黑手嘅傳理學院院長趙心樹搞到要辭任院長，就係證明！

一句講晒，民望低殘賴港府，過橋抽板正垃圾。咁啦，唐唐如果想民望掉頭回升，都唔係冇可能嘅，先為自己為官九年庸碌無能向全港市民道歉，然後宣布放棄參選特首，咁嘅舉動最低限度唔會令到民望再跌，叮！