SUN微博：打橫嚟講

跣直趴街

搞咗十六屆的香港馬拉松長跑，兩次有人陣亡，都是由曾蔭權做主禮嘉賓的，真唔「老嚟」。好咯！下次無佢份，擔保所有健兒平平安安享受一次長跑的愉快。

主辦單位搞咗十幾屆，仍諸多甩漏，有意外或傷亡，就話大家唔想，及唔關你事啫！但一大批跑手在指定時間內完成苦旅，你哋竟無口齒，無「完成獎牌」頒發，令在場人士鼓譟，明顯是失職啦！仲話此乃「國際性盛事」，哈哈！

除叫人有汗出，無「牌」出之外，大會本來應要「全天候」無限量供應香蕉和朱古力給健兒們沿途補充體能的，點知，又係失敗過人，晨早乜都無晒，只剩得較後尾段的水站，有少許香蕉，還要一隻蕉分幾份，像施捨般「派」畀人，做的寒酸，受的可憐！這仲未慘情，賽道上滿地蕉皮，要跑手左閃右避，分分鐘跣直趴街。

上述情景，令人聯想到今年的財政預算案，想食得飽，唔使旨意；派糖？不均勻外，又不足夠；有啲有得食，更多人無得見，舔吓都無份，咁都未算，還有一大堆蕉皮鋪滿地，一睇唔清楚，肯定跣到攤攤腰眼坦坦。

香港人，唔想撻鑊甘，或被人施捨，就要操Fit自己，自求多福吧！因為這處是個國際大都會喎！哈哈！

彭志銘

次文化考古學家，對城中潮語有深入研究，博徵博引，廢官廢人行埋一邊。