政壇：何倍倩追小龍女湊好字
已有一子嘅恒生新抱兼Zensation Beaute行政總裁Anina何倍倩都恨追番個「小龍女」，湊夠一個「好」字，依家正努力「造人」。日前喺中環遇見Anina食完晏返公司，佢報喜話，旗下公司喺美國比華利山嘅首間護膚品專門店，將喺本月十七號正式開幕，佢已經訂晒機票同老公飛過去美國剪綵。
當新店開幕後，佢預計不時要港、美兩地飛，佢擔心一旦懷有龍B，未必可以飛得咁密，所以心情好矛盾。但生番個「小龍女」確係佢心願，近日見到著名設計師好友何國鉦推出BB女裝裙，都忍唔住買定先。龍年大旺嬰兒用品，Anina代理嘅BB護膚品牌都受惠，生意豬籠入水，今年正考慮進軍BB靚衫生意，大發龍B財。
何倍倩好恨生番個「小龍女」，仲話依家正努力「造人」喎！