繼前日舉行大型慈善籌款晚會後，仁濟醫院一眾總理喺尋日元宵又舉行新春酒會。仁濟主席Edmond李文斌同太太Amanda忙足兩日，但見唔到佢哋有疲態。
喺新春酒會見到Amanda同總理、卓悅集團高層鄧肇殷情同姊妹咁細聲講、大聲笑，問鄧肇殷最近忙啲乜？佢好認真咁話忙緊節食減肥，事關近期食得太盡興，要勤力收身至得喇！
數數手指，Edmond一對龍鳳胎已歲半，Amanda笑言一對仔女初學行路，表現活潑，一個愛向左走，另一個向右走，搞到佢索晒氣，唔知追邊個好。
李文斌夫婦齊以Gucci新裝現身仁濟大騷。
