政壇：彭清華叫富貴黨顧大局

富貴黨一行五十幾人喺尋日元宵節去咗中聯辦拜年，但中聯辦主任彭清華單刀直入，叫該黨喺新一年要着眼大局，切實加強同各愛國愛港政團嘅團結合作。今年係選舉年，唔通彭清華知道富貴黨做事冇從大局着眼、冇同愛國愛港政團團結合作，至講出呢番說話？

中通社尋晚出稿，引述咗彭清華向富貴黨提出嘅一番話，佢話面對新一年香港紛繁複雜嘅政治經濟形勢，除咗希望富貴黨着眼大局，切實同其他政團合作，仲要求佢哋和衷共濟，積極為促進香港經濟平穩發展獻計出力，紮實經營，力爭喺參與香港社會政治事務中再創佳績等。

彭主任講嘅雖然係客套說話，但顯得處處有骨。今年係選舉年，富貴黨同其他政團一樣，積極協調、霸位、講數，不過彭主任講到要佢哋紮實經營、做事從大局着眼，似意有所指。不過榮譽主席田北俊尋晚回覆我哋時話，現場氣氛好好，彭主任都係講啲鼓勵說話啫。