政壇：唐媽媽護子裝聾作啞
特首參選人唐唐到依家都唔肯同梁振英同場辯論，估唔到呢招「避重就輕」，佢媽媽唐尤淑圻先至係始祖。
唐唐出身大富之家，竟然當眾公開除鞋「印腳」，呢啲動作除咗有失身份，仲畀人話佢冇家教，相信大家都好想知唐媽媽當年點教仔。咁啱尋日喺仁濟醫院新春酒會見到唐媽媽，記者第一時間上前話同佢傾兩句，點知佢一時手指指天花板，一時指指自己個喉嚨，跟住就用好微弱嘅聲線話現場咪聲太嘈，聽唔到記者講嘢，又怕大聲講嘢令喉嚨唔舒服，所以唔講住喇！但到合適時候，佢又錄音機上身，話聽唔到嘢喎。平時唐媽媽出晒名大方得體，有問必答，今次咁樣避法，相信都係愛兒心切，真係辛苦晒嘞。