政壇：史玉柱聘85後做高管

80後同90後年輕人成日畀人批評好唔掂，但一竹篙唔能夠打晒一船人嘅，好似喺科網行業咁，一向都係年輕人創業嘅天下，八十年代有喬布斯、蓋茨；千禧年代有楊致遠；最近就有facebook嘅朱克伯格。內地巨人網絡嘅史玉柱，似乎亦深明此道，近日就成功向同業挖角，宣布任命年僅二十七歲嘅吳萌出任副總裁，成為巨人網絡首位「85後」高管。

數數手指，今年四十八歲嘅史玉柱，九十年代初都係三十歲出頭首次創業致富，及後幾經起伏，踏上科技創富之路，舊年佢喺微博中高呼長江後浪推前浪，明言巨人網絡要大膽起用年輕人，足以顯示佢一早已揸定主意，公司一定要透過管理層年輕化注入動力。

講番今次被史玉柱挖角過檔嘅吳萌，佢除之前原任內地動網先峰嘅總裁外，亦係《商業大亨》、《超級明星》等網上遊戲嘅製作人，並曾創辦網上社區「番薯窩」兼且擔任CEO，喺內地IT界屬於新星之一，吳萌今次嘅加入，正好配合巨人網絡強化網上遊戲開發同移動網遊業務嘅發展策略。