政壇：搞搞政：五散人下屆立會散晒

立法會「五散人」尋日前後腳到場同傳媒團拜，講到各人去向，據聞廠商會代表林大輝對直選蠢蠢欲動，甚至傳佢有意空降新界西，但做過沙田區議員嘅大輝斷言要直選都去新界東啦！當然佢亦係識計數之人，佢話缺乏樁腳支撐下，好難喺直選勝出，最合情理莫過於繼續代表廠商會。但亦有人分析，指下屆政府畀個官大輝做都未定，所以好難預料將來佢係咪再留喺議會。

同樣有變數嘅資訊科技界「IT豪」譚偉豪，佢喺○八年選舉贏得掹掹緊，加上佢嘅勁敵、香港互聯網協會創會主席莫乃光喺呢幾年並冇放軟手腳，面對呢場硬仗，勝算只係五五波。

醫學界「怪醫」梁家騮對競逐連任不置可否，但有分析話佢嘅形象唔錯，若然肯選，要再贏唔係太難，問題只在於佢係咪想選。最後剩低會計界「波波」陳茂波同保險界嘅陳健波，佢哋成功連任嘅機會都唔細。照情況睇，五散人呢個組合散散哋，下屆恐怕一去不復返。