政壇：高達操弗變自殘

煲呔曾一意孤行，為方便佢喺立法會新大樓宣讀任內最後一份施政報告，搞到添馬艦惡菌處處、毒氣四散。雖然依家有菌問題叫做解決咗，但毒氣四散照舊。

根據立法會秘書處喺上禮拜五（三號）測試嘅結果，新大樓各處空氣內嘅總揮發性有機物（TVOC）含量大致合格。TVOC低過二百六十一ppb先至為之良好級別，唔少議員辦事處嘅TVOC含量回落到雙位數水平，較為高嘅都係一百多啲，唔算好嚴重，議員同埋佢哋嘅助理可以安心返工，唔使日日提心吊膽。

之前冇菌全靠高達

之不過，五樓嘅健身室同儲物室就突然反彈，無事變有事，兩個地方喺二月二號測試時，TVOC含量都只係約二百ppb，但三號忽然急升到三百一十一ppb同三百二十ppb，成為全座大樓僅餘嘅兩個超標地方。

大家咪以為立法會健身室冇人用，好似白鴿黨立法會議員「高達」李永達同工黨主席李卓人都係健身室捧場客，高達不時趁會議同會議之間嘅空檔，用跑步機跑番陣，然後就去廁所沖番個靚涼，繼續醒神開會，有陣時建仔副主席劉江華亦會喺健身室張梳化攤抖吓。前排新大樓爆出多處水龍頭有退伍軍人症桿菌，偏偏就係健身室個廁所冇，咪就係因為高達成日光顧，令惡菌無法積聚孳生囉！

衰啲講句，依家健身室變成毒氣室，議員想入去做運動一係戴定防毒面具，一係帶埋氧氣筒，名副其實做帶氧運動，否則做運動搞到吸毒氣引致不適就唔好啦！