縮骨預算太離譜 安老政策無料到

有「史上最廢財爺」之稱嘅曾俊華,其任內最後一份財政預算案雖然洋洋灑灑,但用「縮骨」兩個字就可以概括晒。新瓶舊酒,驚喜欠奉,尤其喺安老服務方面,濕濕碎碎,唔湯唔水,淨係識得翻炒冷飯,問你服未!

勞工及福利局局長張建宗例牌出嚟解畫,聲稱預算案社福服務資源投入增幅接近一成,其中安老服務佔整體社福開支比例上升到百分之十一,反映港府高度重視喎。叮,講多無謂,食多會滯,即管睇吓佢哋有幾「重視」。

係人都知,政府資助院舍宿位長期供不應求,輪候長者唔止等到頸都長,唔少人甚至等到離世都未能如願。當局由二○一一到二○一五年會新增二千六百個資助宿位,平均每年得六百五十個咁大把,弊在社署輪候冊人數超過兩萬,新增宿位連杯水車薪都算唔上,咁都叫「重視」,面皮厚唔厚啲吖!

另外一樣令長者望眼欲穿嘅回鄉養老措施又點?當局厚此薄彼,最終剩番個「廣東安老計劃」,而且最快都要明年至有望推出。高官養尊處優就話無所謂啫,老人家點等呀?

仲有,當局話會增加五百個改善長者家居及社區照顧服務,同一百八十個日間護理服務名額喎。有冇再少啲吖!當局咁都攞得出手,擺明係玩數字遊戲,敷衍市民啫!

除咗細眉細眼嘅措施,港府又搞搞新意思,由一三年起推出為期四年嘅長者社區照顧服務券試驗計劃,不過首階段只為中度身體機能缺損長者提供津貼。張建宗話喎,喺呢種「新嘗試」下,使用服務嘅主動權掌握喺長者手中。叮!當局無非想推卸責任啫,唔使咬文嚼字玩包裝嘞,老有所養係港府嘅基本責任,以為求其派少少錢就可以關人個關,簡直忤逆!

其實,推行全民退休保障計劃,先至係解決老人問題嘅唯一辦法,社會上亦早有共識,可惜預算案竟然隻字不提。張建宗否認忽視有關建議,又話中央政策組正研究社會保障系統、強積金同個人儲蓄三條退休支柱有冇「優化空間」喎。

叮佢個鎯鎯!係人都知呢「三碌柱」好似生蟲拐杖咁,完全靠唔住,難以保障基層市民老有所依,所謂優化,根本就係「唔化」!

老有所依,老有所養,香港人已經講咗幾十年,但到今時今日仍然係一個遙不可及嘅夢想,簡直可悲。查實,以香港嘅經濟條件,絕對做得到,問題係呢個政府涼薄到冇朋友,唔肯承擔啫,叮!

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!