政壇：搞搞政：鬍鬚曾厚顏認理財短視

出名守財奴嘅財爺曾俊華已經發表咗今屆政府任內最後一份預算案，呢幾日，佢頻頻出席電台節目回顧過去五年嘅工作，尋日仲喺一個電台中高談「問心無愧」。不過，聽真啲鬍鬚曾嘅理財哲學，嗰種死都拗番生、捩橫折曲嘅風格都熟口熟面。

鬍鬚曾發表咗五份預算案，贏得嘅美名係過分短視同保守，唔識前瞻政經大局同成日估錯數。尋日被問到上述批評時，佢竟然直認不諱，仲話「我個人就係一日一日睇，唔係好多話向後望或者好大向前望」，呢句說話畀教車師傅聽到都要鬧喇，只顧睇眼前，點樣創將來呀？

鬍鬚曾仲話「我係保守嘅，作為保守嘅人，對負責財政嘅人係應該嘅」，去到另一個電台節目，佢又以海明威名著《老人與海》作結，以書中老人喺大海同大魚搏鬥，就算筋疲力盡、畀鯊魚襲擊都永不放棄嚟比喻香港人，但佢知唔知書中老人堪稱隱蔽長者典範，孤獨、不善溝通，又成日發白日夢及同海鳥傾偈，最後連海鳥都離棄佢。老人幾經辛苦釣到條大魚，最後更畀啲鯊魚食晒，失敗收場，用呢個故事同角色嚟形容香港，就真係大吉利是！