政壇：龐愛蘭歐遊睇埋隔音屏
沙田區議員龐愛蘭（Scarlett）上月中同屋企人去歐洲旅行，行程中，佢仲順便實地考察多個歐洲國家起隔音屏嘅經驗，原來佢收到好多居民投訴當區嘅噪音問題，所以私人旅行都順便取經。
佢早前建議當局喺吐露港公路兩旁安裝隔音屏，但政府以諸多技術為由話起唔到。Scarlett早排去歐洲，就順便睇吓人哋點做，佢盛讚人哋嘅隔音屏設計美觀兼多元化，又唔使佔用好多位置，質問「點解人哋做到我哋做唔到呢？」
Scarlett十九歲嘅囝囝今次都有份歐遊，佢即將到澳洲升讀醫科，Scarlett話，囝囝起初都對係咪適合做醫生感到好擔心，因為遇到骨折病人亦感到好唔舒服，家吓已經適應咗。
龐愛蘭上月同家人歐遊，與囝囝喺冰天雪地中拍照留念。