政壇：立會四條懶蛇佗衰家 議員加薪難服眾

新一屆立法會選舉九月就會舉行，多個功能界別都傳出一啲消息，盛傳盤據中總立會議席十幾年嘅IQ博士黃宜弘幾可淡定玩多一屆，佢同體育界嘅霍震霆都係立法會四大懶蛇之一，近日立法會秘書處建議下屆全體議員大幅加薪一倍，佢哋就成為市民衡工量值嘅反面教材，真正佗衰有份。日前我哋見到下任中華總商會會長熱門人選、「牛仔褲大王」楊釗，講到IQ博士懶於問政時，楊釗都話要向當事人了解吓情況。

表現差成反加薪例證

其實，功能界別議員問政嘅勤力程度同直選議員差幾條街已係不爭嘅事實，問題係立會四大懶蛇李國寶、劉皇發、黃宜弘同霍震霆嘅表現太出位，搞到議會同仁都有怨言，偏偏喺目前嘅機制下，能夠制衡佢哋嘅都只係界別選民。

尋日霍震霆都有現身另一活動，被問立法會大幅加薪係咪合理，佢推說要睇其他議員意見，咁外界以佢嘅表現作為反對議員加薪嘅例證，霍公子聽到後只係笑一笑、尷尷尬尬咁行咗去。

講開中總嘅席位之戰，原本盛傳中總副會長方文雄及全國政協委員黃英豪今屆都有意挑戰IQ博士，不過早前方文雄表態唔選，日前黃英豪都同我哋講，指IQ博士出到聲想連任，佢梗要支持喇！因為佢爸爸黃乾亨同IQ博士嘅爸爸黃克立係老友，黃乾亨仲係IQ博士老婆梁鳳儀嗰間「勤＋緣媒體服務公司」嘅創始股東之一，黃英豪自己依家都係董事。雖然佢哋素有淵源，但政治早唔係請客食飯喇，局中人都好應該與時並進。