不求仁醫仁術 只求無災無難

港府為堵截雙非孕婦湧港生仔，曾蔭權嘅「曾四招」治標唔治本，畀人鬧爆，其實唔使煩噃，有樣絕招一出，包保公立醫院產房水盡鵝飛，大把床位。

乜嘢招數咁煞食？咪就係層出不窮嘅醫療失誤囉，尤其係涉及初生嬰兒嘅醫療醜聞，更加無奇不有。之前瑪嘉烈醫院「滾水淥B」，伊利沙伯醫院護士剪傷女嬰手指，兩單已經夠得人驚，話口未完又爆多單，今次懷疑接生變虐嬰，咁嘅醫院邊個夠膽幫襯吖？

話說有位孕婦舊年九月喺威爾斯親王醫院分娩未能順產，要求剖腹被拒，醫生用真空吸盤吸出男嬰，結果發現嬰兒腦部受損。院方承認，負責接生嘅醫生接受產科專業訓練只有一個月，佢嘗試用吸盤將男嬰吸出但唔成功，要由另一位資深醫生接手再試至搞掂。嬰兒頭部留低明顯血痕，其後證實腦出血及併發腦膜炎，腦功能永久受損。最離譜嘅係，威院居然唔認數，話唔屬醫療事故，唔需要向醫管局呈報喎。有立法會議員質疑由缺乏經驗嘅醫生接生，顯示院方人手不足。

議員質疑得啱嘞。接生涉及人命，唔係講玩，萬一出錯，隨時一屍兩命。求其搵個初哥擔大旗頂硬上，講得輕啲叫不負責任，講得重啲就係草菅人命！

話時話吖，醫者父母心，如果公立醫院人手足夠，咁嘅事根本唔可能發生。弊在以食衞局局長周一嶽為首嘅醫療高官，對公立醫院婦產科同兒科醫護人員近年大量流失袖手旁觀，關人個關。以將軍澳醫院婦產科為例，硬件設施起好晒，因為醫護流失率高企，新人培養又遠遠跟唔上，搵唔到人做嘢，嬰兒深切治療同婦產科服務焗住要延期展開。

講真，公營醫療系統除咗管理層閒人多多，有邊個部門人手足夠o架？前線醫護人員工作量大，專科醫生做到氣咳，根本冇時間為新手醫生提供臨床指導，醫療醜聞爆完一單又一單，絕對係事出有因。

公立醫院百病叢生，太一叮都唔知叮過醫管局高層幾多次，可惜呢班醫官庸才一味詐傻扮懵，解決問題拖得就拖。好似瑪麗及廣華醫院重建咁，本報早就揭發兩院設備殘舊，甩皮甩骨，當局拖到啱啱公布嘅財政預算案至落實重建計劃，但最長要十三年後至完成重建，問你服未！

不如咁講啦，稚子無辜受傷殘，原因其實係醫官庸才太智障。今時今日去公立醫院求醫，真係提心吊膽，不求仁醫仁術，只求無災無難，周一嶽你真係害人害物，叮！