SUN微博：打橫嚟講：咪瞌眼瞓

夕陽政府最後一份財政預算案，毫無生氣，由一把悶死狗、平過飛機場的音調，死唔斷氣的吟足兩個幾鐘，在議事廳內做老臨的苦主，唔瞌番一覺，好易畀雷劈，因實在太對自己唔住嘞！

帶病上陣的老兵孫明揚瞓到差啲口水流出來，幸好未有鼻鼾聲，確係經驗老到；最不該的，係保安局局長李少光亦瞓埋一份，大佬呀！你撈保安o架！唔怕有傻佬揸刀入嚟亂咁劈o架咩？仲瞓到釣晒魚頭舂舂，絲毫台型都保衞唔到，怎保衞議事廳呀？

唔講大家唔知，原來，大廈看更條例寫明，看更當值期間，不許瞌睡蛇王，如開工時瞓覺，是犯刑事罪，可拉得，要坐監及留案底的！

不知做保安局局長有冇得豁免？如果冇，咁！邊個負責去拉佢呢？

話時話，若李少光被抓去「祭旗」（煲呔用語），佢就真係好無辜的，因原罪不屬於佢，只怪那財政預算太爛、太廢、太無聊、大冗長和太無意義咩！僅剩低三個多月嘅起錨政府，還會有鴻圖大計？有都七年前就叻唔切嘔晒出來啦！我哋不如（目及）實煲呔仲有乜嘢地雷埋下罷啦！千祈咪瞌眼瞓呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

Facebook：sunweibo_2012@hotmail.com

微博：Sun微博小店