政壇：政商定格：鄧鉅明歎雲南鄉土美食
日前喺一個活動見到太子珠寶鐘錶主席鄧鉅明夫婦同細仔，原來太太Emily鄧宣宏雁嘅媽媽由雲南來港度歲，仲帶咗家鄉特有嘅「餌塊」嚟應節。餌塊做法係用煮熟嘅大米壓成塊狀，本身冇味道，所以Emily鍾意加入金華火腿、豆苗同辣酸菜一齊炒，好惹味。如果想轉換口味，又可以加入紅棗，煮到變糖水，認真百變。
原來Emily月初正式出任太子珠寶鐘錶執董，佢話朝朝同老公一齊返公司，學習點樣管理好間公司、同鐘錶品牌代表溝通，得閒仲要熟讀每個牌子背後嘅故事，十足返學咁，仲話喺老公身上學到好多嘢添！
鄧鉅明一家三口過農曆年喜氣洋洋。
鄧宣宏雁媽媽由雲南來港度歲，帶咗家鄉特產「餌塊」嚟應節。（資料圖片）
