政壇：搞搞政：何君堯棄律師會選新西
嚟緊五月香港律師會換屆，現任會長何君堯尋日喺律師會新春午宴上講到明，到時唔會競逐連任。坊間一直盛傳，舊年取代新界鄉議局主席劉皇發成為屯門鄉事委員會主席嘅佢，正積極考慮參加九月立法會新界西直選，尋日佢都承認考慮緊，農曆年初七仲入咗元朗天水圍做地區工作，亦入咗長洲走咗一轉。睇嚟佢上定彈準備上戰場噃！
一年做咗兩年嘅嘢
以往做得律師會會長呢個位，通常都會做兩屆，以便有足夠時間落實任內大計，而律師會章程亦規定每個人最多可以做三屆，計落佢有排都未夠期，所以今次呢個決定，好明顯就係為直選做準備啦！
佢解釋，當初接任會長時，已經講明只做一年，又話自己嘅工作好濃縮，一年就做咗兩年要做嘅嘢，係時候由其他人接手，仲話副會長葉禮德係合適人選喎！
