淫賤黎愛人民幣 北大人愛淫賤黎

「淫賤黎愛人民幣，北大人愛淫賤黎」，聽落好諷刺呢？咁呢句又點睇呀，「賣國有獎，愛國有罪」，係咪匪夷所思呢？其實，太一叮可以話畀大家知，呢啲全部都係真嘅！

呢，又有辦睇喇。話說壹淫媒旗下台灣壹電視製作咗套台劇《拜金女王》，舊年六月喺台灣首播，唔少內地視頻網站亦同步播放，直至七月中播到第四集時，先至被內地國家廣電總局下令禁播。有人將劇集兩度易名，搞出一劇三名嘅笑話，企圖魚目混珠，暗度陳倉，但最後奸計失敗，被內地全面封殺。

即係咁，淫賤黎既然甘做洋奴漢奸，就應該向洋主人討狗餅食，家陣一邊反中亂港，一邊想賺人民幣，又要做婊子，又要立貞節牌坊，咁算點先？有人話淫賤黎全無原則，其實佢何止無原則，簡直厚顏無恥。不過咁，淫賤黎固然厚顏，但北大人一邊痛恨爛蘋果，一邊暗助壹淫媒，好似精神分裂咁，唔到你唔服。

嗱嗱嗱，《拜金女王》雖然被廣電總局禁播，但奇就奇在劇集嘅DVD喺內地仍然周街有得賣，證明禁播令根本有名無實，形同虛設。而更離譜嘅係，另一套由壹電視製作嘅台劇《真的漢子》，由去年十月底首播至今，唔少內地視頻網站大模廝樣同步播放，依家播到第十四集嘞，一直未有被禁，如果話冇人刻意放生，細路仔都唔信啦。

其實，北大人一向敵友不分，放生淫賤黎早就見怪不怪咯。當年壹淫媒財困，走投無路，中資銀行幫佢上市，中資企業畀廣告佢，淫賤黎有今日，全靠北大人嘅咋。仲有吖，珠海出版社舊年居然替淫賤黎出版自傳，為佢塗脂抹粉，歌功頌德添。呢本淫賤自傳後來雖然被勒令下架，但內地市面依家仲有得賣，究竟係監管部門失職，定係有人隻眼開隻眼閉，畫公仔唔使畫出腸嘞啩。

講起財困，壹淫媒近年流血不止，台灣電視燒錢，網站燒錢，香港免費報又燒錢，搞到周身債，可能北大人今次又想拔刀相助，幫淫賤黎渡過難關啩。唔怪得廣電總局禁一套、放生一套，任得壹淫媒嘅不良台劇播通街喇。

正如政協委員劉夢熊話齋，淫賤黎一向反中亂港，佢嘅自傳及劇集竟可於內地流傳，證明「賣國有獎，愛國有罪」。冇錯嘞，你愛國家，國家唔愛你，反而學淫賤黎，一邊反中亂港，一邊誨淫誨盜，包你有大把前途，叮！